Friday 22 January 2010

Yesus Kristus Byebeaben

Yesus Kristus byebeabenya farfyar byedi ryadine: Rofyor snabyedi Maria, ssbuki dapsasor Yusuf, ro fafisu ani imoebesba kuker Rur Besren, rofyor sukenem beimbeswa baim. Snar Yusuf Maria swari, snon benapes dirya, inja imewer ifrur mamyai swari Maria ro fababa, mboi kyara fa imewer famyun i. Bape fafisu kyara fasis swaruser ani, Manseren malaikat byesi oso byair faroi ro mafu bo ikofen: ´ Yusuf romawa Daud wamkak awer fa wun Maria beswa bedi, snar romawa doresya irya samambrab ro Rur Besren. Nari daben romawa snon oso ma nari nwir I be Yesus, snar iso nari bebuk koreri faro er byesi ro sasar sena. Roi bebesya ine ndariryanya insa imnis Manseren wos ikofen faro nabisya: “Mboi nari binkbor oso imobesba, ma daben romawa snon oso ma nari snir I be Imanuel”- isoine : Allah ryous ko. Rofyor byir ro anenef byedi, Yusuf iso rosai Manseren malaikat byedi syoser faroi kwar. Inja dun Maria beswa byedi, Bape denefusi ba isof daben romawa snon byedi ma nyiribe Yesus.

Yesus byebeaben kwar ro Betlehem ro sup Yudea ro awar Wairek Herodes, snon befawinananem mak ono srama ker bar Wamurem be Yerusalem ma sifuken: “Wairek Yahudi beaben baboya Isyaro, mobo ? Nkomam kwar mak byedi ro bar Wamurem ma nkorama fa nkaksyom I.” Fafisu wairek Herodes ma mnu Yerusalem besiper simnaf rarirya sikandor kam. Inja iryur mananir imam ma befawinananem Refo Yahudisya ro er Yahudi, ma ifuken ro si, mob rosaiso nari wairek byebeaben roya. Sikofen faro i bo sobo: “Ro Betlehem sup Yudea snar raris nabisya sfas kwar bosobo: “Ma au Betlehem, wababa syadi mnu-mnu ro sup Yehuda, bape nari manfarkin oso isasyar ro au, fa nari byefarandows er Yesi Israel.” Ramnai kuker fasasis Herodes dor snon befawinananem mak ansi ma kuker ababen kaku ifuken kuker aunos faro si, fafisu rosai makya byairya. Raimnai iwansi be Betlehem dobo: “Mkora, mkosewar pyum kaku insa mkofawi roi bekur Romawa ani ma rofyor mkosrow i kwar, mkobaryas fasau ma beaya insa aya kako yara fa yaksyom I.” Simnaf wairek ani wos byena kwar, sra beri. Indo mam kada, mak smam ro Wamurem ani pyon si isof imnai ro mob rosai Romawa ani, isya ro ya. Fafisu smam mak ani,simarisen kaku. Ma ssun ro rum ani ma smam Romawa ani fnobek snari Maria, inja sbansuba ma sisyom I. Sikam sbas kamom papus sena ma ssbuk samsom farsarser faro I, isoine brawen, mambobo ma manispum.

No comments:

Post a Comment