FAFYAR BEKURU INAI YOMGA MA IKAK KORBENI

Rofandu mnu bero swanandir ro myos Byaki bar wamurm na mnu ri suru sufanam yaye. Mnu Saba a Warwer. Ro fandu keret bekenm ro mnu suinen na iya snori keret Yomga. Insar bero keret inenya ikenm kukru kpu byeskoya skobe kyor. Inai bin oser ma romawa snon ri suru. Imbesrar anskoine kpu skobanine iso befaduru skoro skobawa ya ra isof skobai. Snar sinan skobesuya sumar fyoro kwar. Insar kpu skobanine iswar skoma imor byekandera pdef skoro kanggenm skobena. Ras ras ryande dun robeyan ro yaf byeja fa byuki fyan kpu byanskoine. Bin bero mnu erande ro yaf fa rya munde munda ro ya snori Serbiser. Swaf bero mnu be yaf ya ikwan kaku. Fama insar ine imbran ker roi ro ras ras nja dobe ikwan ba. Imbekpu nansuine ma kawasa kam bembran ro nyan Serbiser sya sifawi ikak korben efawir siro nyan ine munda munde ya ba. Ikak korben ine sneri ryo insar ya kpu bye Yomgai. Inja byark kyara nyan disaiso nari byuki srowi besyani. Rasyanido binbekpu nansuine sumbran wer do nyan Serbiser be yaf skobanya fa sube suyun robeyan mboi sufawi ikak korben anya byark fyair su ro nyan andir anine nja ba. Korben ine byesau-sau fa isrouw kukru Yomgai. Inja kyara ker nyan disaiso nari byuki syewari be rum. Fafisu ine imauws beya a yakbeusru marisn ayedi. Rarirya korben anya dek fa pyark bakn byeja ro aiknam beyors ro nyan andir efanam bam bamu seke ma sado roi imbo insape iwaf imbekpu nansui. Iwaf suro arwo ya ra isof mandira. Inja era be yaf sya kame sfasos fa sibur be swan be rum anenf sena oser-oser. Nyan Serbiser byeusr ba. Aiwan bebor bero nyan ya ban bar sya sefasis kame ma siwaf kam fa sibe sfair roi naknik befarar be ro mob yani. Ro fyor anya Yomga kpuri insape ssuyakbr ma sube sufanam mob korben anya iwaf su ro nani. Fyoro baido surama ro bambam anya nja Yomga dors bo myampum insar kpuri fa dado bepon.snar bambam ine syamswene. Fafisu ine ipyan korben ya fa byeusru baroser erobaido marisn byedi. Ikyui ro ai ipyar bakn byanya roya rarbab isyui ma dakakas ro inokn faru in Yomga byani. Inai inkbor anine myam kero kpuri nja ifawi roi besun ro inokn byaninen ya ba. Dakado ro bam ya rarbab ro sop ya nido insape imbran dusr kpuri ro barpur. Fyoro baido surama rob mob simasasi ro ya inja sumnaisu fa sube suyakmasi snar mob ine ryo nyan andiri. Mob simasasi ro ine fyanam be rum ya nja sramra ido simnaisu fa simasi ramnai insape sisar be mnu ya munda. Inbekpu nansuya suyakmasi ra sumnai bo fyor sube sumbran ya nido insar anya myam ikak eba ya dakas ro kpu inokn faru byani. Rodiya sumgak bo sufrar subur inokn ani. Rofyor sufrar subur anya surowr u ikak anya dor su ro subrusna. Sumor ja sufrar pdef ba imboi sumnai fa sufuknu ikak ebesyani. Sukmu ikak ebesyanja sukabr da sube susewar fa sufawi rosaiso ibe byefandun kaku ro su ni. Ro diya ikak korben anya dawos yob su bo dobe ne… bin muiya ne mumgak awer aya bo muyun aya fa yaso mu be rum. Mboi nari muyofk aya ro sime. Insar anya kpu surowr wos ikak anya byena muraido sumam yaye sumgasna ramnai sube snewar oser fa suyuni. Inja suyuni kukro inokn anya bo subur. Suranda ro rum ido suyofki ro inai inkboru Yomga sim byani. Rob na nido mutiara robaido faduman byeja idameser ro Yomga sim byedi. Roi ebesyan ya srar byansuya sumami kwar. Mboi sumgak sufukni ro imbekpu nansuya ndi. Insar ya ma kpu byanya Yomga sukenm so ikak korben anya kukru kankunes inja inkbor Yomga derer ifawi robeboru efarar bero kenm skobeja ni. Rob na nido ikak korben anine fyarwe bakn byeja fa bye snonggaku ma denf us inkbor anya ro yar anenf byedi. Rarirya fafisu ine imaws be korben ya fa byuk beusru farbuk sube byark kyara ker do ras nayafa nani. Ras paik ma tahun na nfararwer. Nja inai inkbor anyano fyadores erobaido imobsba ma bine srar byansuya sufawi kwar. Inja sufukni bo suyobe mansei befur fa rwa dine ni. Srar subanya dobe roma babo ero mnu inensya ma eso ryama ro aya ba. Mboi ikak korbeno ebark us aya ro sim anenf ayanya ya iso ebe mob inefa rya dine ni. Srar byansuya sukyar i ba. Inja byasu kedwa sim byanya fa insape manggunsu sumamu korben ani. Ma rofyor anya sukandor kaku. Mob ine srar subanya ma ikak korbenya sufruri fyoro kwar. Mboi mambekanaek ansuine sufawi barya sumsor naba kaku. Suyayino srar subanya bo subur i. Mambekanaek ansuya sumgak kawasa ero mnu nansinensya sakfawi mob anya fa skomai rirya sube snewar oser fa sube sumunu ikaku korben anine. Rasyanido susasyar fa suyobe suranda suraswan. Suyaron yar karui bero mnu ya bandari na. Bape susmai in mgun esero baberi. Subur kukru raryab ero susnesna ba rande ro rum ido korben anya ifukn su bo dobe ‘sasewar mu be ro rasinenya ryarso?’ Suyobe ‘nusma in mgun esero baberi snar nusambrab fa nuyaron be swan ya dori ba. Ma nusmai royo fa nubuki myunu insya ba. Korben anya dobe rarirya ido mufasos airares erobaido adwar rars no snar naiso kobuki myun in bero karu na bab nansi. Sumnaf nyan korben ya ikofn be su na nja. Suryab naba kaku ma sumbran beri be sup fa susewar adwar rars ikak ya ikofn be su na. Fyoro baido susasyar ro sup kukru adwar rars na bos ri fyak. Rarirya suyun na be rum ma surir na faro korben ani. Mesr di korben anya ma mambekanaek ansuiya skosasyar fa skobuk adwar na nsewar ine. Skoranda skomnai ro mob u skobe na insya sibor do ya nido karui bero diyan ya snori Inggo. Skopyar ro dine ma skobuk adwar na eninyan in in bero karui ne bab di nsi. Fyoro baido insya sisasyar ro karu ya bab di boi sibe simar inja sibur sambrab ba. Inja mambekanaek ansuya suryab bo suyas suryur si. Korben ya byuk purai byeja fyarepen way skobanine. Daron byeninyan insya kaker kukru adwar anna boi ifawi ro nakero efuri nya ba. Mambekanaek ansuya suyas suryur insya boi sukara fa sube sumun korben aninenja. Suyek ro waya bori fa swaf ker ine subuki byeusru swaruser ebyeba subani. Rodiya romawa eba nanya duf sumber byanya ma byukiwapuk korben anya fa bye mnuk ri war. Kur ine korben anya ima imar beri. Mnuk ri war anskoya skosnos naisine. Karui Saram, Sawaki, Kaduki, ivengger, Womensimbrir, Amawi, Mansasyo. Sumamun da sumnai subur kukru wai ya be rum imboi korbenya bakn byanya ma subur i ro mob sumun i roi. Subur da ro rum ido sufafyar roi sufur na kam be insar kpu subanya ma korben anya swari Yomga kpur sumnaf fararur ebyeba nanine mura sumsor bo subur be sup ya dori rande sube ras ri fumo. Rodiya subur kabr be swan erobaido rum insama sukram ikak ya bakn bye ero mnuk mnuk ansi. Suranda suryuru korben anya mnuk byansya ma insape sube si fa sbark pampan ro bar Wambarek be bar Wamurem ro barpon mnu Saba ma mnu Warwer. Fyoro baido korben ya mnuk byansya sufardwer be karui fa si isof babo ine bebe myos bo ekain pampam ansirai. Mamun anya imnai ido Yomga paik byena namnis fa ikapar. Inja ikapar ikak mgun ri samfur. Yomga byekabom. Inja tahun di beso nawas ido snon bero keret Fainan ryama dor fa dakbuki. Bo keret bin ya byansya simarisen inja subuk su. Farbakbuk bepyum anine imbran kawan ba. Snar ro fafisu snon ya byeoser kukru bin ya nido sararyur bero bin ya syun ro bakn byedya muraido imar. Marmar ine byewar bar bin ya ma bar snon ya smun yaye si. Rofyor skara sewar ro ebyewar u marmar ya nido insar kpun anya iso ebe aryawin kukro undamnofa insape ikak mgun ya syae i. Ikak mgun ri samfur u Yomga ikapar anskoya iya iri. Mob ine iso insape imkok farbuk kankuns korbenya kukru inkbor Yomga subanya fa sfaryas i ro mnu ya ma isyer fafyar ro snonggaku sya kame. Keret Yomga simai inja sesnewar eser bo spai wai sena bo skabor sorn ya be bar wambarek ra skain ro Sorong raja Ampat. Fanam war mgun yanja snir war ine be Yomga. Isof ro dine fafyar inkbor Yomga ma ikak korben ro mnu Saba Warwer.